腔调
弄堂里大清早，镬子里呃泡饭烧潽特了，心里厢勒拉想事体。
昨天夜到，阿三打电话过来，讲约好后天，沓鼻涕，野猪猡，浩浩一道去医院望望燕君，今朝夜里厢先碰只头。
照道理讲，燕君生了恶毛病，阿拉是要去看看的，伊拉老公阿华头帮阿拉是赤窠兄弟，从小一道长大的。但是阿华头最近几年以来的吃相越来越难看，弄得大家有点尴尬。靠廿岁呃辰光，阿华头隑（音盖）了伊拉爷呃牌头，做黄沙，石子生意，铜钿赚得莫老老。格呃辰光伊出手大方，台型扎足。外头交际广，阿拉格帮瘪三伊也呒末忘记忒，一道吃一道白相侪是伊埋单。也弗晓得啥辰光，七花八花，隔壁弄堂里最登样的燕君也骗到手。有一句讲一句，年轻时的燕君，长得清爽，雪白粉嫩，168的身段妥妥的大长腿，讲闲话细声细气，脾气又好，不过按照浩浩的讲法就是脑子不大好。“哪恁看中了阿华头？”当然迭呃是后头讲的，当初伊是吃瘪的。刚结婚三年，老头子大概吃了忒多了，突然之间，脑溢血，翘了。阿华头呃生意登时立刻，直线下降，造房子老板呃面孔搨了糨糊，生意只好小心维持。坏就坏拉掼派头的恶习改不脱，外加赌博手气又不炀，几年下来，公司关门。外头上班伊是肯定不去的，呒末腔调。弄了爿烟杂店，也不好好做，三天捉鱼，两天晾网，劝他不要赌了，劝不听，钞票借了又弗还，大家看到伊：吓。小囡侪靠燕君照顾，感觉也呒末几年，小白菜就变菜皮了，现在还躺在医院，作孽！
去望生病人末，总归弗好空手呃，碰头是要讨论尺寸。
屋里厢先要摆平。吃好早饭嗒老婆讲：等歇衣裳吾来晾出去，侬忙来兮，先去上班哇！等伊要调拖鞋的辰光讲：今朝夜饭弗拉屋里吃了，几个小兄弟碰碰头。“㑚几只老棺材有撒好碰头，还不是吃吃喝喝！接小囡，覅忘记！”请假是要讲究节奏的。
下了班，接好小囡，去了咪咪饭店。
咪咪饭店老位置，吾到呃辰光只有沓鼻涕呒末来。一歇歇，沓鼻涕笃笃悠悠进来了：锃锃亮的小分头，穿得山青水绿，一副生意人呃笑面孔，就是香水有点不分场合。伊原来跟拉阿华头后头拎包，好处弄着不少，一看苗头弗对，马上另起炉灶，做了十几年房产中介，店面开了三爿。外头人模鬼样阿拉弗管，勒拉格嗒还是沓鼻涕，头塔照打。阿三看人到齐了，就开始了“兄弟们，燕君呃事体侪晓得了佬？”“嗯”“伊拉屋里厢呃事体大家弗好弗管的，兄弟们凑点钱，去望望伊，从小一道白相呃！”“吾呒末闲话！”沓鼻涕倒了杯啤酒。“大家格末每人5000元，哪恁？”阿三倒是开门见山。一片寂静。“尺寸是有眼大，但是阿华头确实是呒啥钞票。”野猪猡本来一直勒啦歠哜（音触祭），装戆本事蛮大，一声不吭盯牢酒杯看。阿三又看了看浩浩，浩浩长叹一声“唉....”“侬不要死样怪气，爽气点！”阿三蛮有眼领导腔调的，一顿抢白。浩浩从小心眼多，是个早熟的文艺才子，燕君就是伊带入圈子的，勒啦伊读大学的时候被阿华头撬忒了。“买点花，看看末算了，现在还送钞票，戆哇！”“侬老是弄点虚的，有意思哇？”
沓鼻涕贼忒兮兮“再讲又弗是别人！”“侬覅笑我，当初酸的又弗是我一个！”浩浩支牢伊。吾支持阿三，转畀（音拨）了伊，大家默认了，野猪猡讲：“我只有三仟。”“侬，哪恁又狗屁倒灶！不入调！”格只花猪猡被他老婆捏牢骱（音嘎）之后，彻底失去经济权，野不起来了。阿三又骂他，“就侬头浪长角呃！”野猪猡表情尴尬。阿三对沓鼻涕笑了笑，表情夸张：“陆总！”格声‘陆总’一般是不出口的。“弗来赛！”陆总了解意思。“就两仟，你能者多劳，补补齐！”有钞票就是狠，要哄的。“是啊，本事还是侬大！”我和浩浩翘边。“五个人，二万三！不好听！到辰光就帮阿华头讲是侬发起的，侬呒末忘记忒伊老早待侬呃好！阿华头肯定抱牢侬，眼泪水㳠㳠滴！”“册那，㑚就会搿（音格）起伙来吃吃我，凭啥！吾弗要伊讲吾好，吾老早待伊覅忒好，伊瞒牢燕君勒拉外头搞七廿三，吾还帮伊打掩护，后撒来我自己做生意，伊就一直怪我对不起伊。”“还有侬，野猪猡，上趟店里只小鬼，帮人家吵相骂，到派出所，侬个小辅警还装不认得，侬啥意思？”陆总气呼呼，声调越来越高。“侪是小事体，兄弟们计较迭呃做啥！”阿三打圆场“伊还弗是为了口饭吃，侬不要怪伊！”“多末多畀，少末少畀！”陆总吃了口啤酒，“反正我弗多出！”伊态度坚决，说完就朝门外走了，“老板，结账！”陆总格点自觉性还是有的。“侬覅走呀！闲话还呒末讲光！”阿三想叫牢伊，陆总睬阿弗睬伊。
正事结束，开始闲聊。“侬最近身体哪恁？”“小囡读书好哇？”“工作好混哇？”“啥辰光一道约场麻将？”一帮子烟酒不离口的人聊健康，滑稽哇？一帮子躺平的人聊工作，有劲哇？一帮子loser还帮别人
出主意，讽刺哇？巧弗巧，阿华头打电话过来，伊讲要开刀，缺三万急用。阿三讲兄弟们会的想办法
呃，叫伊放心，明天去医院。柒仟的额度哪恁解决？阿三讲要末阿拉三个再摊摊！格么哪恁办？约好时间，散场。
时间到了，陆总的车准时停在医院门口，急匆匆跑过来，拿阿三拉到一边，摸出一个信封，神秘兮兮，说了几句话，和我们挥挥手就走了。阿三过来解释，“吾后头又打电话畀伊，讲阿华头开口了，格记蛮爽气呃，又拿了壹万过来。还特地关照吾‘不要嗒阿华头多讲。’册那，吾还不晓得伊，就是要我特地当阿华头的面讲一声！”“伊不讲迭句闲话就不是伊了，掼只铜板一定要听响声呃。”大家笑了笑，浩浩讲“不过，关键时刻伊是模子！”
人到中年，格帮子男人就格眼腔调。